UM GNÚPVERJA

UPPHAFIÐ

Meistaraflokkur Gnúpverja í körfuknattleik var stofnaður vorið 2015 á Selfossi þar sem nokkrir meðlimir félagsins voru saman komnir í páskafrís fögnuði.

Ungmennafélag Gnúpverja var stofnað 1927 en hefur venjan verið að þeir sem hyggjast stunda körfuknattleik færi sig yfir í Ungmennafélag Hrunamanna og æfi og leiki undir þeirra merkjum. Engin aðstaða er í Gnúpverjahrepp til körfuknattleiksiðkunar og hefur þetta því verið ágætis lausn.

Engu að síður ákváðu Gnúpverjinn Jón Einar Valdimarsson og Hrunamennirnir fyrrverandi Máté Dalmay og Svavar Geir Pálmarsson ásamt nokkrum hressum drengjum úr Kópavogi að skrá lið Gnúpverja til móts í 3. deild KKÍ fyrir keppnistímabilið 2015-2016.

Framundan voru ákveðnar hindranir. Finna þurfti húsnæði á höfuðborgarsvæðinu til að æfa og leika heimaleiki í. Útvega þurfti búninga og ýmislegt annað.

Liðið hefur frá upphafi fjármagnað iðkun og þátttöku í keppnum að mestu leyti úr eigin vasa en einnig með einhverjum fjárstyrkjum frá fyrirtækjum. Um er að ræða lið samansett af metnaðarfullum ungum strákum sem hafa tröllatrú á verkefninu og eru tilbúnir að leggja allt á sig fyrir liðið.

ÁRANGURINN

Á sínu fyrsta tímabili gerði nýstofnaður meistarflokkur Gnúpverja í körfuknattleik sér lítið fyrir og sigraði 3. deild KKÍ. Var deildartitillinn tryggður í úrslitaleik gegn Laugdælum en áður höfðu Gnúpverjar tryggt sér sæti í 2. Deild með sigri á liði KFÍ b á Ísafirði.

Eins og gefur að skilja varð róðurinn erfiðari fyrir Gnúpverja í 2. deild heldur en tímabilið áður í 3. deild. Engu að síður tryggði liðið sér sæti í úrslitakeppni um sæti í 1. deild. Gnúpverjar mættu meisturum 2. deildar síðastliðin tvö tímabil, Leikni, í úrslitaleik um sæti í 1. deild og sigruðu með sannfærandi hætti með bestu framistöðu sem Gnúpverjar hafa sýnt á körfuknattleiksvelli. Gnúpverjar töpuðu síðan fyrir sameinuðu liði Hrunamanna/Laugdæla í úrslitaleik 2. deildar sem fram fór á Flúðum.

Gnúpverjar eru eina liðið í íslenskri körfuknattleikssögu sem hefur tekist að fara upp um tvær deildir tvö tímabil í röð. Er liðið ótrúlega stolt af þeim merka árangri en er hvergi nærri hætt, stefnir enn lengra og ætlar sér að halda áfram að skrifa íslenska körfuknattleikssögu.

Gnúpverjar að fagna sæti í 1. deild. Upp um tvær deildir á tveimur tímabilum.
FRAMHALDIÐ

Með sæti í næstefstu deild á Íslandi tryggt er liðið í stífri styrktarþjálfun sumarið 2017 og ætlar að mæta með ákefð og áframhaldandi baráttu og dugnaði til leiks á komandi tímabili. Svavar Sigursteinsson í Sporthúsinu sér um styrktarþjálfun Gnúpverja í sumar.

Mikil vinna er framundan. Þarf liðið á stuðningi góðra fyrirtækja að halda svo það geti tekið þátt í 1. deild KKÍ á komandi tímabili. Metnaður liðsins er mikill innan vallar sem utan. Á sama tíma og leikmenn leggja mikið á sig við að koma sér í enn betra leikform er mikið lagt í að umgjörð félagsins sé eins og best verður á kosið.

Ef þú hefur áhuga á að leggja okkur lið hvetjum við þig til hafa samband með því að senda okkur tölvupóst en netfangið er info@gnupnation.is.